Eolas Fúinn

Is ar mhaithe le forbairt na nEalaíon Dúchasach agus Comhaimseartha sa Ghaeltacht a cuireadh tús le hEalaín na Gaeltachta, comhpháirtíocht idir Údarás na Gaeltachta agus An Chomhairle Ealaíon.

Cuireann Ealaín na Gaeltachta seirbhísí agus scéimeanna deontais ar fáil, a thacaíonn le forbairt eagraíochtaí ealaíona agus le healaíontóirí aonair.

Oíche Chultúir sa Ghaeltacht 2025

An bhfuil sibh réidh don Oíche Chultúir i mbliana? Mar chuid den cheiliúradh náisiúnta ar Oíche Chultúir tá imeachtaí á n-eagrú sa Ghaeltacht ar an Aoine, an 19 Meán Fómhair 2025 le tacaíocht ó Ealaín na Gaeltachta.  Beidh ceol agus focail fileata le clos, drámaí, scannáin, físealaín agus ealaín sráide le feiscint, agus úrláir rince ag feitheamh libh ón Rinn go Rann na Feirste agus ó Oileán Ghabhla go hInis Meáchta.

Ranganna sna healaíona dúchasacha i gConamara agus Árainn.

Tá áthas orainn clár ama Cuisle – clár sna healaíona dúchasacha don óige de chuid Ealaín na Gaeltachta – a sheoladh arís i mbliana. Cuireann Cuisle ranganna sa cheol traidisiúnta, na healaíona béil, damhsa agus amhránaíocht ar na sean-nós ar siúl i rith agus i ndiaidh am scoile i gConamara agus Árainn.

Tá buíochas mór ag dul do theagascóirí Cuisle as an obair mhór a dhéanann siad leis na gasúir ó bhliain go bliain, lena chinntiú go bhfuil na healaíona dúchasacha á gcoinneáil beo i measc óige na Gaeltachta.

Tá muid ag baint úsáide as córas nua clárúcháin i mbliana agus síleann muid go ndéanfaidh sé seo rudaí níos fusa dúinn go léir. Is é an córas Class For Kids atá in úsáid againn agus is éasca é a úsáid.

Le do ghasúr a chlárú ní gá ach cliceáil ar an nasc Clárúchán – CUISLE  nó an Cód QR atá ar an gclár ama a scanadh agus a úsáid.

Féach ar an bhfíseán gearr anseo le treoir a fháil, más gá: Treoir maidir le Clárú ar Class For Kids.

N.B. Is gá íocaíocht a dhéanamh lena chinntiú go mbeidh do ghasúr cláraithe. Ní bheidh aon spás cinntithe go dtí go mbeidh an táille íoctha.

Tá clár Cuisle – clár óige Ealaín na Gaeltachta – arna mhaoiniú ag an Roinn Forbartha Tuaithe agus Pobail agus Gaeltachta.

Cónaitheacht Heinrich Böll d’ealaíontóir le Gaeilge atá lonnaithe sa Ghaeltacht  

Tá Cumann Heinrich Böll ag lorg iarratais ó ealaíontóirí le Gaeilge atá lonnaithe sa Ghaeltacht (scríbhneoirí, ceoltóirí, amharc-ealaíontóirí) le haghaidh cónaitheacht choicíse i dTeachín Heinrich Böll in Acaill sa bhliain 2026. 

Le tacaíocht ó Ealaín na Gaeltachta agus ó Chumann Heinrich Böll, cuirfear liúntas €600 agus lóistín ar fáil mar chuid den chónaitheacht. Beidh an t-ealaíontóir féin freagrach as costais bhia, ábhair agus taistil.  Is tearmann uathúil é seo, oiriúnach dóibh siúd ar mian leo éalú ó fhuadar an tsaoil laethúil. Is é an aidhm atá ann go mbeidh an t-ealaíontóir in ann díriú go hiomlán ar a gcuid oibre, agus ag an am céanna, Oileán Acla a úsáid mar fhoinse inspioráide dá gcuid saothair.  Tá dhá sheomra leapa, cistin, seomra suí, dhá sheomra staidéir agus stiúideo sa teach. Níl aon nasc teileafóin ná idirlín ann.  Tugtar cuireadh d’ealaíontóirí, más mian leo, cuairt a thabhairt ar scoileanna nó clubanna áitiúla ar an oileán agus a saothar féin a chur chun cinn trí ócáidí poiblí.  

Glacfar le hiarratais suas go dtí an 30 Meán Fómhair 2025.

Oiliúint Comhionannais Míchumais d’Fhéilte agus d’Eagraíochtaí Ealaíon

Oiliúint Comhionannais Míchumais d’Fhéilte agus d’Eagraíochtaí Ealaíon á cur ar fáil ag Arts & Disability Ireland:
Dé Máirt 30.09.25  7–9 i.n. ar líne nó Céadaoin 1.10.25 10–12 i.n. ar líne

Tá an oiliúint seo dírithe ar eagraíochtaí ealaíon atá ag iarraidh ealaíontóirí agus lucht éisteachta/féachana atá faoi mhíchumas a chur san áireamh sa méid a dhéanann siad.

Scéim Forbartha na nEalaíon 

An bhfuil tú ag smaoineamh ar iarratas a dhéanamh ar Scéim Forbartha na nEalaíon i mbliana chun togra nó gníomhaíocht ealaíon d’ardchaighdeán a chur ar siúl sa Ghaeltacht? Is é an chéad spriocdháta eile d’iarratais ná 25 Meán Fómhair 2025. Tabhair faoi deara go bhfuil mionleasuithe déanta ar an scéim an babhta seo. Má tá tú ag ullmhú d’iarratais, bí cinnte go léann tú an treoir agus an fhoirm iarratais leasaithe atá ar fáil anois ar shuíomh Ealaín na Gaeltachta.

Maoiniú ar fáil: idir €1,000 agus €15,000

Spriocdháta: Déardaoin 25 Meán Fómhair 2025, 5 i.n.

Cláraigh do Nuachtlitir Ealaín na Gaeltachta anseo