Scéim Oiliúna

Tá an Scéim Oiliúna oscailte d’ealaíontóirí, d’eagrais nó do dhaoine aonaracha atá ag forbairt nó ag cur na n-ealaíon chun cinn sa Ghaeltacht. Tacaíonn an Scéim le deiseanna oiliúna agus traenála a bhaineann le cleachtas agus gairm ealaíne a fhorbairt agus le deiseanna cumasú agus dea-chleachtas a fhorbairt in earnáil na n-ealaíon sa Ghaeltacht. Tacóidh an scéim le hoiliúint ghairmiúil, nó le hoiliúint ar chaighdeán gairmiúil.

Réimsí Maoinithe

1. Ceardlanna, cúrsaí agus ócáidí oiliúna sna healaíona;
2. Meantóireacht agus Scáthú;
3. Costais taistil & lóistín a bhaineann go sonrach le freastal ar na deiseanna oiliúna atá luaite thuas.

Iarratais a Bhaineann leis an Óige

Tá an óige mar thosaíocht i straitéis reatha Ealaín na Gaeltachta, agus tá ciste sonrach againn le díriú ar fhorbairt na n-ealaíon dúchasach agus na drámaíochta don óige trí chlár Cuisle, le tacaíocht ón Roinn Turasóireachta, Cultúir, Ealaíon, Gaeltachta, Spóirt & Meán. Is féidir iarratas a dhéanamh ar an Scéim Oiliúna ar mhaithe le forbairt a dhéanamh ar chleachtais ealaíontóirí nó oibrithe ealaíon Gaeltachta atá ag plé leis na healaíona don óige, lasmuigh de chomhthéacs an oideachais foirmeálta.

I gcomhthéacs na hóige, d’fhéadfadh an Scéim Oiliúna tacú le cúrsaí, le forbairt ghairmiúil nó le meantóireacht d’ealaíontóirí maidir lena gcleachtas sna healaíona don óige.

Ní thacóidh an scéim leo seo leanas:

• Iad siúd atá díreach i dtús forbairt a dhéanamh ar a gcleachtas in aon réimse ealaíne;
• Cúrsaí tríú leibhéal, gnéithe a bhaineann le cúrsa tríú leibhéal, nó iarrthóirí atá fós sa chóras oideachais ag an dara nó ag an tríú leibhéal;
• Ceardlanna ealaíon don phobal i gcoitinne.

Conas iarratas a dhéanamh

Moltar teagmháil a dhéanamh leis an Áisitheoir Ealaíon nó leis an Oifigeach Forbartha Ealaíon don Óige sula ndéanfar iarratas ar an Scéim.

Caithfidh iarratasóir an fhoirm iarratais a líonadh ina hiomláine le cur síos sonrach a thabhairt ar an oiliúint atá beartaithe. Tá sé inmholta go mbeadh an fhoirm clóite agus go mbeadh sí sínithe ag an iarratasóir sula gcuirfí i ríomhphost í chuig cuisle@udaras.ie (má bhaineann an t-iarratas leis an óige) nó chuig ealain@udaras.ie (mura mbaineann). Is gá aon ábhar tacaíochta riachtanach a chur leis an iarratas agus é a chur ar aghaidh ar a laghad ceithre seachtaine roimh dháta tosaigh na hoiliúna.

Ábhar tacaíochta riachtanach

• CV ealaíon an iarratasóra;
• Nasc nó cóip don chlár a chur ar fáil d’aon chúrsa foirmeálta;
• Cuntas beatha/CV/Eolas faoi aon mheantóir nó oiliúnóir;
• Fianaise d’aon socrú aon uaire nó foirmeálta le meantóir, oiliúnóir srl ina gcuirtear síos ar shonraí na hoibre (tréimhse, dátaí agus costais na hoiliúna atá aontaithe).

Cad a tharlaíonn má cheadaítear deontas duit?

Eiseofar litir thairisceana a leagann amach méid an deontais agus na coinníollacha a bhaineann leis. Is gá an litir seo a shíniú agus a chur ar ais chuig Ealaín na Gaeltachta mar aon le foirm sonraí bainc sula n-íocfar an deontas. Is gá gurb ionann ainm an iarratasóra agus an t-ainm atá ar an gcuntas bainc.