Aidhm na Scéime
Tabharfaidh an scéim tacaíocht aon uaire do thionscadail ealaíon agus deis le gníomhaíochtaí ealaíon ar ardchaighdeán a fhorbairt agus a chur ar siúl sa Ghaeltacht.
Tosaíochtaí na Scéime
Freagraíonn an scéim seo go sonrach do na tosaíochtaí seo a leanas i bPlean Straitéiseach Ealaín na Gaeltachta 2023-2027:
- Rannpháirtíocht an phobail sna healaíona a mhéadú;
agus/nó
- Tacú le healaíontóirí Gaeltachta a gcleachtais agus a ngairm bheatha a chothú agus a fhorbairt.
Samplaí de thionscadail a dtabharfar tacaíocht dóibh faoin scéim
- Tionscadail ó ghrúpaí nó ó ghréasáin ealaíontóirí le saothar nua a chruthú nó le saincheist ealaíne a fhreagairt do phobal na Gaeltachta nó i gcomhar leo.
- Tréimhse chónaitheach ina mbeadh ealaíontóir ag obair i gcomhpháirt le grúpa pobail/eagraíocht ealaíon/ionad ealaíon/scoil.
- Tionscadail ealaíon líonraithe agus fiosrúcháin cleachtas ealaíne a chur chun cinn –siompóisiam, seimineár, taispeántas nó léiriúchán, mar shampla.
- Coimisiún: Ealaíontóirí a chur faoi choimisiún le saothar nua a chruthú mar chuid de ghrúpa pobail/eagraíocht ealaíon/choiste, mar shampla.
- Taighde/réamhléiriú ealaíon nó tréimhse idir-chleachtais le seó, léiriúchán nó tionscadal ealaíon a fhorbairt.
Tionscadail agus/nó iarratasóirí nach bhfuil incháilithe faoin scéim seo
- Eagraíochtaí atá ag fáil maoinithe cheana féin faoin Scéim Cothú atá ag Ealaín na Gaeltachta.
- Tionscadail/Gníomhaíochtaí atá níos oiriúnaí do scéimeanna maoinithe eile de chuid Ealaín na Gaeltachta nó de chuid eagraíochtaí eile.
- Féilte ealaíon, cé is moite den chás a mbeadh lucht eagraithe na féile ag feidhmiú mar choimisinéir lasmuigh de chomhthéacs na féile féin.*
- Féilte pobail, spóirt nó turasóireachta Gaeltachta.
- Tionscadail taifeadta nó foilseacháin (ceol, litríocht, eile) lena n-áirítear aon obair réamhullmhúcháin a bhaineann leo.
- Oiliúint cleachtais, freastal ar chúrsaí nó eile, nó tionscadail a bheadh níos feiliúnaí do Scéim Sparánachta d’Ealaíontóirí, don scéim Síol nó don scéim Oiliúna.
- Tionscadail ealaíon don óige a bhfuil baint acu leis na healaíona dúchasacha nó leis an drámaíocht. Is gá iarratais maidir leo siúd a dhéanamh tríd an scéim Treisiú.
- Forbairt gnólachtaí cruthaitheacha.
*tá Scéim na bhFéilte Ealaíon sa Ghaeltacht á reáchtáil ag Ealaín na Gaeltachta agus ag an gComhairle Ealaíon lena n-aghaidh seo.
Critéir na Scéime
Déanfar na hiarratais a mheas de réir chritéir na scéime agus i gcomhthéacs bhonneagar Ealaín na Gaeltachta. Beidh iarratais á meas de réir na gcritéar thíos:
- Próiseas cruthaitheach samhlaíoch ar ardchaighdeán agus plean oibre a thaispeánann aidhm, an próiseas agus an toradh a bhfuiltear ag súil leis ón tionscadal;
- Páirtíocht ealaíontóirí gairmiúla sa tionscadal agus iad ag fáil táillí cuí;
- An Ghaeilge: Is trí mheán na Gaeilge a dhéanfar an tionscadal;
- Cur chuige soiléir maidir le rannpháirtíocht agus/nó forbairt lucht féachana don tionscadal;
- Obair go dtí seo: Taispeánfar go bhfuil saothar d’ardchaighdeán cruthaithe/léirithe ag an ealaíontóir/ag na healaíontóirí/ag an ngrúpa cheana;
- Struchtúr/Cumas láidir léirithe ag an gcoiste/eagraíocht/ngrúpa/duine mar aon le taithí ar bhainistiú agus ar chur i gcrích tionscadal;
- Cur chuige soiléir maidir le meastóireacht, cuntas a choinneáil agus tuairisciú (le cruthú físe) a dhéanamh ar an tionscadal ó thús go deireadh;
- Foinsí eile maoinithe agus tacaíocht aimsithe don tionscadal. Is féidir maoiniú, urraíocht & sochar comhchineáil (m.sh. ionad) a chur san áireamh anseo;
- Beidh an tionscadal fréamhaithe i gcomhthéacs an cheantair agus beidh tionchar aige ar fhorbairt na n-ealaíon agus ar neartú réimsí ealaíne faoi leith go háitiúil agus go réigiúnach.
Tabharfar tús áite do thionscadail a bhfuil comhoibriú ar bun acu le heagraíochtaí/grúpaí eile Gaeltachta agus/nó náisiúnta.
Cúrsaí cánach & tréimhse an deontais
Beidh ar iarratasóirí a n-éiríonn lena n-iarratas fianaise a chur ar fáil go bhfuil a gcuid cúrsaí cánach in ord. Caithfear aon mhaoiniú a cheadófar a éileamh taobh istigh de thréimhse 18 mí. Mura n-éileofar an maoiniú taobh istigh den tréimhse sin, cuirfear ar ceal é.
Tá dhá chéim sa phróiseas iarratais ar Scéim Forbartha na nEalaíon 2026:
Céim 1
Léiriú Spéise a dhéanamh leis an áisitheoir réigiúnach roimh spriocdháta an léirithe spéise. Ní gá ach teagmháil a dhéanamh leis an áisitheoir ealaíon réigiúnach, trí ríomhphost nó glaoch fóin.
Spriocdháta Léirithe Spéise, Babhta 1
2 Feabhra 2026
Spriocdháta Léirithe Spéise, Babhta 2:
20 Meitheamh 2026
Céim 2
Iarratas forbartha a sheoladh isteach roimh spriocdháta Scéim Forbartha na nEalaíon.
Spriocdháta Scéim Forbartha na nEalaíon, Babhta 1:
5 Márta 2026
Spriocdháta Scéim Forbartha na nEalaíon, Babhta 2:
23 Iúil 2026
Is gá an fhoirm iarratais agus an buiséad a líonadh ina n-iomláine agus a chur chugainn i dteannta an ábhair tacaíochta riachtanaigh agus roghnaigh roimh spriocdháta na scéime.
Nuair a bheidh an t-áisitheoir sásta go bhfuil an t-iarratas, buiséad agus na doiciméid tacaíochta ar chaighdeán sásúil agus go gcomhlíonann siad na critéir, cuirfear ar aghaidh é chuig an gcéad chruinniú boird eile de chuid Ealaín na Gaeltachta.
D’fhéadfadh an t-áisitheoir an t-iarratas a choinneáil siar go dtí go mbeadh sé forbartha go leor le cur os comhair an bhoird. Cuirfear an t-eolas seo ar fad in iúl duit le linn an phróisis.
Rochtain
Má tá tú faoi mhíchumas agus dá mba mhaith leat cúnamh a iarraidh chun iarratas a dhéanamh, déan teagmháil linn a luaithe agus is féidir roimh an spriocdháta.
