Scéim na bhFéilte Ealaíon sa Ghaeltacht 2024
Spriocdháta: Dé hAoine, 15 Márta 2024
Tá Scéim na bhFéilte oscailte d’fhéilte ealaíon Gaeltachta atá á reáchtáil agus á gcur ar siúl trí mheán na Gaeilge.
Critéir le haghaidh maoinithe
Beidh na nithe seo a leanas curtha san áireamh agus an t-iarratas á mheas:
- Fís shoiléir ealaíne ina mbeifear ag súil le clár cruthaitheach samhlaíoch imeachtaí d’ardchaighdeán.
- Rannpháirtíocht ealaíontóirí gairmiúla san fhéile, agus táillí cuí á n-íoc leo.
- Úsáid na Gaeilge i gcur chuige agus i gcur i láthair na féile.
- Plean/Sprioc shoiléir ó thaobh lucht féachana/rannpháirtíochta a mhealladh, a fhás agus a leathnú amach. An gaol leis an lucht féachana/rannpháirtíochta a láidriú, le béim faoi leith ar an bpobal áitiúil i gcoitinne.
- Go bhfuil foinsí maoinithe nó tacaíochta eile aimsithe ag an ngrúpa. Is féidir maoiniú, urraíocht, úsáid ionaid, am deonach agus sochar comhchineáil a chur san áireamh anseo.
- Cumas bainistíochta agus riaracháin ina gcuirfear taithí an duine/an ghrúpa, struchtúr, agus réimse saineolais agus speisialtóra san áireamh.
- Plean i dtaca le meastóireacht, forbairt agus feabhsú leanúnach na féile agus tuairisciú a dhéanamh ar an bhféile nuair a bheidh sí críochnaithe.
*Ní ghlacfar le hiarratais don scéim seo ó eagrais atá ag fáil maoiniú tríd an Scéim Cothú*
Ciste
Tá uasmhéid tacaíochta €15,000 ar fáil. Déanfar iarratais ar an scéim a mheas bunaithe ar na critéir thuasluaite. Tá an scéim seo iomaíoch agus níl ach buiséad teoranta ann.
An Óige
Tá an óige mar thosaíocht i straitéis reatha Ealaín na Gaeltachta, agus tá ciste sonrach againn le díriú ar fhorbairt na n-ealaíon dúchasach agus na drámaíochta don óige. I gcás go bhfuil gníomhaíochtaí don óige beartaithe mar chuid den fhéile, déan cinnte iad a lua go sonrach sa chlár agus sa bhuiséad thíos.
Coinníollacha Deontais
Caithfear aon mhaoiniú a cheadófar a éileamh taobh istigh de thréimhse 18 mí. Mura n-éileofar an maoiniú taobh istigh den tréimhse seo, cuirfear ar ceal é.
Tá sé riachtanach do gach eagraíocht a mbíonn baint aici le leanaí agus le daoine óga Beartas Um Chosaint Leanaí lena bhfuil Ráiteas um Chosaint Leanaí, Measúnú Riosca agus na nósanna imeachta cuí á gcur i bhfeidhm, a chloínn leis na treoirlínte mar atá leagtha amach san Acht um Thús Áite do Leanaí, 2015.
Próiseas Iarratais
Moltar duit dul i dteagmháil leis an Áisitheoir Ealaíon i do réigiún sula seolfar an t-iarratas chugainn. Tá sé riachtanach go mbeadh an fhoirm sínithe ag Cathaoirleach an Choiste/Stiúrthóir an Eagrais agus curtha chugainn ar ríomhphost. Tá sé riachtanach na doiciméid tacaíochta ábhartha a bheith iniata leis an bhfoirm.
Foirm Iarratais le híoslódáil anseo: https://ealain.ie/tacaiocht-ata-ar-fail/
